Quandu unu vá pol campu i vé tó cercau, lavrau, sembrau o hechu plau es mu deficultosu comprender qué hazi ena metá de parti nenguna un lagar rupestri de piçarra. En el puebru del Guixitu, hincau por cima duna veta cuarcítica (velaí el nombri del Guixu, dau que guixu dimana del saxum romanu), andurreandu por olivaris, parralis, caminus enguachinaus, vereas esborronás es faci desnortar-si entre tantu subibaxa. Los olivaris salin a somatraspón, lo mesmu que algún pinu paí perdíu i ocalitus enas barrancas del arró Grandi. Molinus farrungaus colos sus cortijinus hechus añiscus enos recuéncanus delas corrientis d'agua quierin dar a entender, meyu empelotinus ya, que l'azetuna era antis tó, peru inorantis delas Ateneas griegas ván cayendu entre escobas i xaras.
 |
Lagareta dela Quesera'l Moru
|
El passau delas pieras lavrás ni se sabi dendi quándu vieni, peru sí barruntamus lo pocu que le quea. La su fuélliga agora s'escaeci i eslicia entre la fusca delos campus, enos lindonis aburríus, en metá dun paisagi que muamus demasiau ligeru i del que agora mos echamus cuentas.
 |
Lagareta i cinchu
|
Velaí detrás delos caminus, delos parralis, delos olivaris, ondi namás entra la maquinaria dun ombri i los animalis a revezu: en el Tiriñuelu guixiteñu arroeau de lombinus, costanas lavoreás, matorragis i regatus está assitá la que llaman la Quesera'l Moru.
 |
Detalli dela boquera dela lagareta dendi huera
|
Los acuerdus delos antiguus que davan en llamar lo que era de mu patrás romanu o moru, sin ser ni romanu ni moru. Assina vemus cuevas, pozus, puentis que si no son morus son romanus por tós laus. Pocus s'acuerdan delos cristianus, porque los cristianus huerun los que assentarun un mundu nuevu que enos tiempus moernus está a esboronar-si en tó i por tó. Essus cristianus bautizarun los campus, las pieras, los ríus, los casaris esborrandu lo que avía, mesmu cumu hazin agora los moernus cola lenguagi universal.
 |
Boquera dendi dentru
|
Essi Tiriñuelu era dun turrim que s'olviá enos siclus anterioris, sitiu pobrau, cumu buena cuenta dan la parvá de retejonis esparramaus paquí i pallí de costrucionis, obras i hechuras d'ombris antiguus. I más anterior, en metá d'aquellu delo que oi no quea ni la conseña, una lagareta lavrá ena piçarra, alo mejor pa vinu, alo mejor p'azetuna: no lo sabemus. Entre el xaral i las tierras lavoreás malamenti se lei la tierra.
 |
Pilón lavrau entre las xaras
|
Ena parti cercana al puebru siguin a criar parras. El olivu es onipresenti en tolas tierras estas, monocultivu que se destiendi más largu delo que s'atifa: namás los plaus pa vacas rompin los linius. Enantis del molinu por huerça del'agua apaecer, estava el que era de pieras i maerus manerus, con huerça bruta.
 |
Detalli del cinchu
|
Por tola Península s'esparraman los antiguus lagaris lavraus en el granu... peru pocus se vén que sean ena piçarra. I sin embargu, velaquí, unu que conoci el seranu dela luna, namás arropau polas xaras i las escobas, con el mosgu verdi d'estus días úmius bicha sin importancia nenguna, ena umildá de naidi recordar lo que hue.
 |
Boquera del cinchu ala lagareta
|
La lagareta i el cinchu (por essu lo dela quesera) son resaltantis, conas boqueras comunicantis, una cimera entre el cinchu i la lagareta i otra baxera de sangraera pondi caíva el çugu a un pilón lavrau que apeninas se destingui dela fusca.
 |
Canchu cercanu con rebaxi
|
Pola parti de detrás se vei un otru canchu lavrau, quiciá a sustener angún pontón o viga de maera. Polos laus retejonis de tolos tamañus i mesmu un peaçu de piera de granu tumbá. Namás quea estu.
 |
Retejón
|
 |
Piera de granu cercana
|
La maginación dela genti d'esta parti enventó lo de que aquí hazían quesu los morus. Tamién dizin essu en el puebru del Guixu (de Graná), ondi tamién ai una obra apaecía. Qué le importa ya delas pieras estas alos moernus? Ná le dizin: ni el lavoreu a rebaxar la piera, ni estripandu los rezimus o las azetunas, ni el acarreu, ni la lengua que palravan aquellus que hazían estas cosas en unus tiempus ondi tó era más despaciau i se poían esparigir a ver las prantas muar la color cola toñá, salir enas parés los embuíllus o sentir los paxarinus a dar-si barrigazus en el'agua delos regatus. Queará la copia dela retrataúra i el barru enos botus.
Comentarios