El μῦθος, ena su lengua original, o mitu sirvi pa echar-mus una idea delas cosas sin espricación. El propiu mitu no tien espricación: está aí, corri en boca en boca, ameirenta, maravilla, susprendi i ala final, se despareci dela mesma manera que vinu. Quandu los viejus mos palran d'animalis que agora namás vemus enas penículas i mesmu porfían que assina essestierun porque lo contavan los sus antepassaus (i essu, cudiau, es utoriá en custión de mitografía) o porque ellus propius los vierun, mos queamus con el celebru hiziendu chiribitas, porque de que sueltan el mitu, velaí el efeutu.
 |
El Hornu'l Dragu
|
Tristimenti namás encandilan essus cuentus que mos quearun los griegus i essus son los que aprendin enas escuelas. Peru ya no puein hazer ná colas recriacionis d'ordenaor, el inseñu 3D i las nuevas tenologías del imagi. El zagal ya no puei maginar siquiera porque el mostru, el bichu o la raredá está ena pantalla del su mobi o dela tabreta. Cómu á de maginar-si un zagal agora un dragu que acagaçava la genti ai siclus paí perdíu enas sierras que namás los pastoris conocían?
 |
El Hornu'l Dragu dendi en baxu
|
La istoria del Dragu del Pozuelu o de Santa Crus (el assuntu delas lindis se las queamus alos que destraçan mapas i arrayus) se hizu mentá entre folcloristas, mitografus i procuraoris d'antiguañas colturalis por causa del escritu de Publio Hurtado ai más dun cientu d'añus. Él mos cuenta, sin mentar las huentis, el cuentu del dragu de dos cabeças que vivía en el cerru dela Bardera, nel serrejón de Dios Pairi.
 |
Unu delos picachus del sitiu
|
En una abrigá que hazin una peñas, no mu largu del caminu vieju a Santa Crus, agora entre robris que quierin pular entre el disloqui de pinus i ocalitus, vivía un dragu bicéfalu que colgava duna argolla animalis que caçava pa escarná-lus i comé-lus.
 |
Vistas dela sierra de Dios Pairi, cola ermita arriba
|
El ansia del dragu acerullava la genti delos puebrus delas sierras estas porque arramplava con tolos animalis de ganau i mesmu colas pessonas. Comu no estava contentu, aballó pal sul, en busca delos estremeñus de Badajós, alogu en cata delos andaluzis i endispués pal África.
 |
Chimenea (alo mejor dondi recolgava l'argolla)
|
La istoria compreta pas que no está, que quearun cosas importantis por relatar i que se perdierun en el tiempu. No ai euri, ni milagru, ni origi. Mesmu, el topónimu dela peña'l Dragu con el que se mienta la parti aquella pareci posterior i que pocu tien que ver con la Bardera o otrus nombris más tradicionalis. Los saltus que da el dragu en cata de más comía pareci dun relatu geográficu con el píu de destender las facatúas del animal i una manera de cerrar el cuentu. No estanti, otras versionis dizin que regressó i espenó nel sitiu de hambri i que los zangarrus los gastarun aluspués pa componer las presas delos lagaris, atillandu el dragu conos olivaris i l'azeiti.
 |
Otru buracu del hornu
|
Dizin en el mitu que los vezinus le llevavan animalis pa calmar los alaríus, astilu sacrificiu, cumu se puei revistear entre los cuentus griegus del Minotaurus i otrus mostrus dela naturaleza: no es que namás caci, tamién le llevavan otrus animalis pa hartá-lu.
 |
Morgañu a incultar-si nun buraquinu
|
La istoria rezienti mos palra de ser esta peña esconderichi delos maquis enos tiempus enos que s'arrefugiavan enas sierras (casus aparecíus encontramus pol Valli del Xerti). Sigún mos contó un azetuneju que estava a humar quandu aportemus al sitiu (la colilla la tiró alogu entre la follarasca delos robris, entre las xaras), allí estuvun a escarvar el suelu por ver si avía un tesoru i que quitarun las argolla de atar los cavallus que estavan p'algún sitiu dela abrigá. No puei ver seña de ná d'essu, peru sí los hoyus de ver estau paí los piterus. No sedría una buena istoria de dragus si no se metieran los assuntus bélicus de por mediu.
 |
Otra delas peñas, ondi está la cara
|
El hornu de piera ondi comía i descansava el dragu no es destintu d'otras peñas que se vein por frenti, enas pistas forestalis que atraviessan la sierra de Dios Pairi. Sin embargu, pola sitación an pie de viejus caminus vezinalis, la hechura dela piera en horma de cueva, una por cima aspecii de estrébedis con varias chimeneas (hoyus en el techu i alos laus) i otra por baxu, justu an pie dela supuesta cara del dragu que ensoma pal norti i que está ogañu enllenu d'embuíllus que procuran pol sol, s'entiendi que tuvu que ser un sitiu especial palos antiguus pastoris i caminantis.
 |
Cara del dragu (?)
|
Dendi allí se puei ver la costana dela Bardera que da pal norti, el serrejón de Dios Pairi i varius sierrus cercanus. Desconoçu si es sitiu arquiológicu con evidencias materialis d'assentamientus, pinturas, fuélligas o conseñas d'alguna crassi.
 |
Embuíllus
|
 |
Aujeru passanti
|
 |
Vistas del Hornu dendi abaxu
|
Agora el dragu duermi enos livrus antiguus, ena toponimia i ena menti
delos folcloristas que recadan i dan propaganda a estas cosas enas sus
vestigacionis. Inoru si los pozolinus o los cebollerus conocin la
istoria de manera oral (no polos mentaerus cultus delas revistas i los
trabajus d'esparramamientu) i si está umentá o no añidin cosas que essas
mentacionis delos escrivientis train enos sus endirgus. Enque no quein los zangarrus del bichu por gastá-lus enos lagaris, sí quea una istoria dun dragu que por estas tierras anduvu esgalamíu i angunas dragas que entovía se mientan pa assutar los niñus enos puebrus dela Higal o dela Mairoñera. Los sitius mitológicus están más cerquina delo que parecin ondi la sencia delos antiguus seris entavía es escapás d'imprenar el vesitanti d'ogañu namás con aposar los pies en essi sitiu i aprofundar cona menti lo que los ojus no son escapás de caçar.
Más enteracionis:
Hurtado, Publio., "Supersticiones extremeñas".
Domínguez Moreno, José María, "Despoblados extremeños: Mitos y leyendas"
Castaño Blanco, Antonio, Hidromitología y lecturas. Aplicaciones a educación, cultura y turismo.
Comentarios