El molinu la Juana de Montermosu
Enos recuéncanus i revirivueltas del arró Tuna que da al desembocar en el ríu Alagón s'arrepelotonan los molinus i lagaris. Tristimienti tamién lo hazin las çarças, las escobas i los caçaoris pa estus sitius mediu bravíus mediu domaus pol afán del azeiti.
 |
| El molinu la Juana |
Dispués de olivaris i escobalis, lombus, coturrus, caminus que passan a vereas i al revés, an pie mesmu del arró Tuna apaeci un caçumbu farrungau de piçarra, retangular, en un recuéncanu del arroyu, en un llanu suavi.
 |
| Paré farrungá i ventana |
Ata no vé-lu por drentu no s'avrigua si es molinu o casilla, porque la cenzillés dela hechura dendi arriba es compricau de saber: se trata del molinu la Juana.
 |
| Hornichi |
La puerta, que da pal sul-ponienti, está falta de toça i con ellu de la metá dela paré parriba, hiziendu que no se sepa si avía escrición o no ena cal cumu acontenci con otrus molinus i lagaris dela parti esta. Muchas delas pieras están en el mesmu lumbral amontoná pa un lau i pa otru dela puerta.
 |
| Rinconera |
Ala derecha formi se entra ai un hornichi sigún reza ena retrataúra. La bechinalis delos palus entovía s'aprecian enas parés i mesmu anguna que otra ventana. La parti del suelu no s'aprecia demasiau por estar tapau por çarças i rosalis bravíus colos sus rebentabueyis coloraínus recolgandu por cima delas muelas.
 |
| Muelas |
Pala parti trasera entovía se vei la muela baxera i una cimera contra la paré. Pol aujeru del arvu ena baxera se vei por baxu la sala del'agua, destacandu-si el ruesnu.
 |
| Ruesnu i puenti |
Pa ver la parti baxera ai que passar por una alambrá i un fuscarral d'espinus. La saliera está limpia, de má que se puei retratar quasi que tol funcionamientu del molinu, viendu la cozera pondi cai el agua, el puenti i el ruesnu arriba.
 |
| Cozera |
 |
| Muela hiziendu de toça |
Hiziendu de toça ai una muela de granu por cima delas ombreras de piçarra. Está entera i ai que acachar-si i mirar parriba pa vé-la.
 |
| Esquina que da al norti |
 |
| Arró Tuna junta'l molinu la Juana |
Dela canal que servía de cauzi quasi que ná s'aprecia, enque ai muchas pieras i la horma entre las escobas. El'agua corri limpia i tranquila por esta rinconá, dendi la que se vén las oliveras i los plaus delas Corças. Más abaxu quea el molinu la Retuerta i por cima el lagar d'Almea, peru ni unu ni otru se vei dendi allí. Cumu la huerça de molinus i lagaris montermoseñus, tós quean atarugaus por causa dela fusca i los bardalis, enque esti es vesitavri por drentu. Los caminus antiguus están perdíus i ya quasi que son vereas de vacas pa ver las costrucionis dela genti de patrás (molinus, lagaris, puentis, passaeras, vaeras, noras, zanca-burras, chufardus, hornus...) i si no las tan odiosas alambrás, parés de piera i angarillas candás.
Con tó i con essu, lo peor dela vesita huerun los cientus de tirus que los caçaoris estavan pegandu esti día dela Pura pala parti de las Passaeras i las Roças, aguas arriba, que rebumbavan enas barrancas del arró Tuna, ameirentandu los animalis que vivin livris i los que asollagan ataus i aburríus enos uertus que pegan al arroyu. Una Estremaúra que es el paraísu del caçaor senifica ser siquiátricu, mataeru i carci toas tres cosas ala ves. El andarín no vesita los campus i las ruinas tranquilu, peru peor aquellus animalis que ahuyendu delas escopetas acaban entallaus enas carreteras... i essu los que son escapás d'ahuyir.
Comentarios